आफ्नै आँगनमा नेपथ्यः

'यहाँ कार्यक्रम दिँदा आफ्नै आँगनमा छम्मछम्म नाँच्दै गाए झैँ लाग्छ ।' मैनापोखरी घटना गाउँदा गम्भीर देखिएका अमृत विस्तार रमाइलोतिर प्रवेश गर्दै थिए । दर्शक पनि मनखोलेर साथ दिने तरखरमा रहेको कुरा तालीको गडगडाहटले जनाउथ्यो । आफ्नो ठाउँबाट हुर्केर चर्चित भएको व्याण्डसित रमाउन पाउनु पोखरेलीका निम्ति झन उत्साह थप्ने विषय थियो । प्रौढ दर्शक तालीमा मस्त थिए भने युवायुवती कम्मर मच्काउन । हाल नेपाल यात्रामा रहेको नेपथ्य संगीत समूहले पोखराको दीपेन्द्र सभागृहमा माघ ५ र ६ गते प्रस्तुत गरेको सांगीतिक कार्यक्रमको सन्दर्भ हो यो । तस्वीरः नेपालय
सन् १९९० ताका काठमाडौमा अध्ययनरत पोखरेली दीपक राणा, भीम पुन र आफ्नो सक्रियतामा नेपथ्यको स्थापना भएको संस्मरण गर्दै अमृतले कार्यक्रममार्फत मनोरञ्जनका साथै देशप्रेम र नेपाली भाइचाराको भावलाई शक्तिशाली बनाउनु पर्ने आग्रह गरे । कार्यक्रम प्रस्तुत गर्दा हरेक ठाउँमा आफूले
'तपाईहरूलाई हाम्रो राष्ट्रिय झण्डा कत्तिको मनपर्छ ?' भन्ने प्रश्न गरेको उल्लेख गर्दै उनले त्यही प्रश्न पोखरेली माझ पनि दोहोर्‍याए । खचाखच हलबाट 'असाध्य मनपर्छ ' भन्ने जवाफ मात्र आएन, दर्शकले हातमा राष्ट्रिय झण्डा फहराउँदै अमृतसँगै रिमाल रचित 'रातो र चन्द्र सूर्यमा' स्वर मिलाए । दुईघण्टासम्म चलेको कार्यक्रमा नेपथ्यका चर्चित लोकप्रीय गीतका साथै श्याम तमोटको 'गाउँ गाउँबाट उठ' र प्रमोद हमालको 'आऊ मिलाऊ हाम्रा हातहरु' मा पनि अमृतले दर्शकबाट उत्तिकै माया बटुले ।
पोखराकै युवाबाट सुरु भएको नेपथ्यलाई यसपाली सिद्धार्थ क्लबको सक्रियतामा पोखरा भित्राइएको थियो । 'शान्तिको लागि शिक्षा' आवाजका साथ सम्पन्न कार्यक्रमको पहिलो दिन स्कुले विद्यार्थी, अपाङ्ग र सामाजिक तथा आर्थिक कारणले मनोरञ्जनबाट टाढा रहेका दर्शकलाई निःशुल्क प्रवेश गराइएको थियो । दोस्रो दिनको सःशुल्क कार्यक्रमबाट संकलित रकम भने सिद्धार्थ क्लबको कोषमा जम्मा हुने जानकारी गराइएको छ । साथै सो रकम सामाजिक कार्यमा खर्चने कुरा पनि क्लबका पदाधिकारीले जानकारी गराएका छन् ।
पुस ६ गते नारायणघाटबाट थालनी भएको नेपथ्य संगीत यत्राले निर्धारित २५ कार्यक्रम मध्ये महिनादिनमा १९ वटा कार्यक्रम सम्पन्न गरिसकेको कुरा मुख्य आयोजक नेपालयले जानकारी गराएको छ । आयोजकका अनुसार कार्यक्रम सम्पन्न अधिकांश ठाउँमा नेपथ्यका प्रस्तुतिलाई स्थानीय एफएम रेडियो र केवल टीभीले प्रसारण गरेको र त्यसले 'शान्तिको लागि शिक्षा' को आवाज अनगिन्ती दर्शक श्रोता बीच पुग्न सहज भएको पनि जनाएका छन् ।