>> तराई बन्दमा तोडफोड भएपछि चालकद्वारा महेन्द्र राजमार्ग बन्द

काठमाडौ ११ पुस २०६३ । सोमबार तराई बन्दका क्रममा नेपाल सद्भावना पार्टी आनन्दीदेवीका कार्यकर्ताहरुले २५ वटा सवारी साधन तोडफोड गरेपछि आक्रोशित सवारी चालकहरुले आज बिहानैबाट महेन्द्र राजमार्ग बन्द गराएका छन् ।
चालकहरुले सोमबार साँझदेखि नै महेन्द्र राजमार्गमा पर्ने बर्दघाट-बुटवल सडक खण्डमा बस र ट्रक तेर्साएर सडक अवरुद्ध पारेका थिए । सवारी चालकहरुले तोडफोड भएका सबै सवारी साधन र सो क्रममा घाइते भएका १० जना यात्रुलाई क्षतिपुर्ति नदिएसम्म सडक अवरोध जारी रहने जनाएका छन् । राजमार्ग अवरुद्ध भएपछि अलपत्र परेका तीन सय बढी यात्रुहरुलाई स्थानीय क्लवहरुले खाने र बस्ने व्यवस्था गरेका थिए ।
यता सद्भावना पार्टीले सोमबारको बन्दको कार्यक्रम फिर्ता लिइसकेपछि गाडीमाथि तोडफोड भएकाले त्यसको जिम्मा आफ्ना कार्यकर्ताले नलिने उल्लेख गरेको छ। अवरुद्ध राजमार्ग खुलाउन प्रहरीले दुवै पक्षसँगको छलफल प्रयास गरिरहेको बताइएको छ।